LAOAG CITY – Inpasingked ni Bombo International News Correspondent Jonathan Austria idiay Myanmar a natlaged ti kasasaad dagiti Pilipino iti nasao a paglilyan iti laksid ti coup d’etat.
Segun kenni Austria, awan met ti madi a mapaspasamak kadakuada gapo ta naurnos met ti pannakikoordenar ti Philippine Embassy kadakuada a Pilipino iti nasao a pagilyan.
Inbatad na nga adda pay ti ipapaay ti Embahada kadakuada a Pilipino a libre a panagawid kadagiti agkalikagom nga agawid no adda man ti kellaat a dakes a mapasamak gapo iti kudeta.
Inlawlawag na nga awan ti mapaspasamak a gulo ngem ketdi adda ti maiyus-uswat nga Stay at Home Movement no sadinno ket agprotesta da iti uneg ti pagtaengan.
Nupay kasta, kunana nga iti laksid nga iti uneg ti pataengan ti panagprotesta ket adda latta ti panagamak da gapo iti posible a tensyon iti nagbaetan ti militar ken dagiti tattao nangruna no iti rabii.
Mainaig iti daytoy, kunana a dagiti residente idiay Myanmar ket alisto nga agpanic a rason ti temporaryo a panagrikep dagiti ado a pasdek negosyo.
Kunana a kas General Manager iti Gym ken maysa a negosyante ket madlaw na nga awan met ti nagbaliwan ti bilang dagiti mapmapan kadakuada gapo ta natalged met dagiti tattao iti dalan ken awan ti ar-aramiden dagiti pulis kadagitoy.
Kabayatanna, kunana a dagiti OFW ken dadduma pay a puli a trabahador ket awan dagiti makuna a final benefits ken no kayat dan ti agawid ket awan ti maala da a benipisyo manipud iti employer da gapo ta daytoyen ti nabayag a masursurot iti nasao a pagilyan.
