LAOAG CITY – Mannarimaan ti pannaka-iyurnus dagiti stockpile ti Provincial Social Welfare and Development Office (PSWDO) nangruna ita a panawen ti panagtutudo.
Inlawlawag ni Mrs. Rochelle Gajes, officer-in-charge iti Provincial Social Welfare and Development Office, a saan laeng a dagiti food packs ti iyur-urnos da no di ket pakairamanan dagiti non-food items.
Mainaig iti daytoy, inpakaammona nga iti agdama ket adda ti nakasagana 7,415 a family “food packs” babaen ti Provincial Government of Ilocos Norte (PGIN) a karaman kadagiti naka-preposition kadagiti pito a “satellite” a bodega ti opisinada.
Imbatadna a masarakan dagitoy a bodega ti Provincial Social Welfare and Development Office iti ili a Currimao, siudad ti Batac, centennial bodega, Solsona, Pasuquin, Banna, ken iti ili ti Pagudpud.
Inbunannagna nga iti “non-food items”, adda met dagiti nakasagana nga ules, tuwalya, tsinelas, coffee mugs ken nagduduma nga aruaten.
Malaksid iti daytoy, inpakaammona nga adda pay dagiti nakasagana a 630 a sako ti 50 kilos nga NFA rice ken adda pay 285 packs a tig-lima a kilos a bagas.
Kabayatanna, impasigurado na nga awan ti expired kadagiti isagsaganada a food packs.
