LAOAG CITY – Maysa nga agtawen ti 53 nga street food vendor iti maysa a tiendaan idiay Punjab, Pakistan ti patok kadagiti gumatgatang iti lugar gapu ta saan laeng gapu iti kinaimas ti lakona no di ket gapu pay ta kaing-ingasna ti Presidente ti United States a ni Donald Trump.
Ubing pay laeng ni Saleem Bagga ket am-ammo isunan iti lugar gapu iti panagbalinna a genetic condition a maaw-awagan nga albinism.
Iti panagtaengna, ad-adda a naam-ammo pay isuna iti kinagagetna a mapan aglako ti Kheer wenno sweet rice pudding.
Gapu iti panangabak ni Donald Trump iti U.S. Presidential election, ad-adda manen a naripar isuna ken immadu dagiti gumatgatang kenkuana.
Naammoan a kabayatan nga idurduronna ti food cart-na iti tiendaan ket adu ti umasideg kenkuana tapno maki-selfie.
