LAOAG CITY – Napagsasaritaan dagiti Thai netizens ti ladawan ti maysa nga street food vendor gapu ta karuprupana unay ti karakter ni Keannu Reeves a ni “John Wick.”
Nagbalin a misterio iti kallabes idiay Thailand dagiti ladawan nga agwarwaras iti online nga arig nga aglaklako ti kape ken inihaw a pusit ni John Wick.
Adu ti nasdaaw gapu ta kaing-ingasna la unay ti sikat nga action movie character. Sumagmamano pay kadagiti netizens ti nangipagarup nga agbakbakasion idiay Thailand ni Keannu Reeves.
Ti John Wick ket sikat nga action movie franchise maipapan iti maysa a dati nga hitman a nagretiro tapno agbiag iti naulimek a lugar ngem idi natay ti asawana ken natakaw ti tarakenna nga aso ket nagsubli daytoy nga agaramid ti krimen ken sumubbot.
Ti karakter ni John Wick ket naam-ammo gapu iti kinalaingna kadagiti laban ken determinasion a magun-od ti karebbengan. Naipabuya daytoy idi 2014 ken iti agdama ket addaan daytoyen ti tallo a sequel.
Gapu ta awan ti makaibaga ti naan-anay nga impormasion iti likudan dagiti ladawan iti misteryoso nga street vendor, ad-adda pay a napagsasaritaan iti online agingga a dimmanonen kadagiti news program iti telebision.
Saan a nagbayag, naammoan a ti street vendor ket ni Andreas, maysa a lalaki manipod idiay Germany a bisbisitaenna ti Thai girlfriend daytoy iti Nakhon Rachasima Province.
Naduktalan a saan a pudno nga aglaklako isuna ken napanunutanna laeng a tumulong iti maysa nga street food stall nga asideg iti apartment-na. Kalikagumna a mapadasan nga aglako ti street food ken usarenna daytoy kas content iti online account-na.
Iti agdama, arig ket maibilang a celebrity ni Andreas idiay Thailand gapu ta sadinoman ti pagturunganna ket adda dagiti mangala ti ladawan kaduada isuna.
