LAOAG CITY – Naragsak nga inpakaammo ni Mr. Regie Bajo, maysa nga Street Food Vendor ditoy siudad ti Laoag a napagturposna ti anakna iti kolehio babaen ti panaglakona kadagiti nagduduma nga street foods.
Inbatadna a saan a nalaka ti agpabasa iti kolehio gapu iti kinaadu a paggastoan ngem inkarigatanda nga agasawa a makapagturpos ti maysa kadagiti annakda.
Inlawlawagna nga uray kasano ti kinarigat iti panagbiag ket ikarigatanda nga isakad ti panagadal dagiti annakda gapu ta mamatida nga agasawa a ti edukasion ken panagturpos iti panagadal dagiti annakda ti pudno nga ibakbaknangda.
Kunana nga idi damo ket marigatanda nga agasawa ngem bayat ti panagtulid ti panawen ket nakaallukoydan dagiti sukida a gumatang kadakuada.
Mainaig iti daytoy, kuna ni Bajo a maysa kadagiti dakkel a pannubokda ket no panawen ti panagtutudo gapu ta marigatanda nga ipaibus dagiti lakoda.
Innayonna a gungundawayanda pay a mapan kadagiti lugar nga adda dagiti maisaysayangkat a programa wenno aktibidad tapno al-alisto a maipaibus dagiti lakoda.
Kabayatanna, naammoan a sakbay a nagbalin nga Street Food Vendor ni Bajo ket dati daytoy a maysa a tricycle driver.
