LAOAG CITY – Balligi a naarestar ti maysa a lalaki babaen iti naiwayat nga Anti-Illegal Drug Buy-bust Operation iti Brgy. Manalpac iti ili ti Solsona.
Daytoy ket kalpasan ti nagtitipon a puersa ti Provincial Drug Enforcement Unit, Philippine Drug Enforcement Agency ken ti Philippine National Police iti ili ti Solsona.
Segun ken ni Police Captain Christopher Pola, ti Action Officer iti Provincial Drug Enforcement Unit, nabigbig ti suspek a ni Ronnie Gamboa y Carlos, agtawen iti 31, naasawaan ken residente iti nasao a lugar.
Inbatadna a natiliw ti suspek kalpasan a naglako daytoy ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Malaksid iti daytoy, inpalgak ni Police Captain Pola a nakumpiskarda pay manipod iti suspek ti tallo nga heat sealed transparent plastic sachet a naglaon ti maipagarup a shabu nga agdagsen ti sumurok-kumurang a walo a gramo ken agbalor ti 54,200 a pisos pakairamanan ti maysa a pedaso ti genuine 1 thousand peso bill ken siam a pedaso ti boodle 1 thousand peso bill a nausar kas buy-bust money.
Inlawlawagna nga idi pay laeng umuna a kuarter ita a tawen ti panangiwayatda ti surveillance iti nasao a suspek ken maibilang daytoy kas Street Level Individual.
Mainaig iti daytoy, naiget a naglikudan ni Gamboa a kukuana dagiti nakumpiskar a kontrabando.
Inpakaammona a dati a naibalud daytoyen iti New Bilibid Prison idiay Muntinlupa City ngem nakaruar met laeng idi 2022.
Kabayatanna, manamnama a sumango iti kaso ti suspek gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
