LAOAG CITY – Kinumpirmaran ni Police Captain Michael Permison, hepe ti PNP Currimao, nga inarestar da ti subject ti search warrant a residente iti Brgy. Maglaoi Norte iti ili ti Currimao.
Kuna na a nakailanad iti search warrant nga adda ti maipagarup nga ikikoten ti subject a kalibre 45 a paltog ken ti bala na nga awanan ti lisensya ken maibilang a panaglabsing iti RA 10591.
Segun kenni Permison, nupay saan da a nabirokan ti nakalanad iti search warrant, nakarekobre da manipud iti uneg pagtaengan ti maseknan iti maysa nga air gun, airsoft gun pistol, maysa a magazine ti airsoft gun ken maysa a bala ti kalibre 38.
Naamuan ni Permison a no mabartek ti subject ket pangbutbuteng na ti nasao a klase ti paltog ngem saan nga agpappaputok.
Kuna na a nabayagen a naireklamo ti subject seknan ti insidente.
Saanen nga innaganan ni Permison ti subject ti search operasyon.
