LAOAG CITY – Kinumpirmaran ti Department of Budget and Management (DBM) nga adda ti P238 bilyon a pundo ti gobierno tapno solbaren ti epekto ti mapaspasaran nga oil shock iti pagilian.
Iti panagdengngeg ti LEAD Committee iti Kamara de Representantes, inbatad ni Acting Budget Secretary Rolando Toledo a ti pundo ket aggapu iti 2026 budget ken kadagiti continuing appropriations ti administrasion Marcos.
Inpetteng ni Toledo a tutukan ti gobierno iti targeted assistance nga imbes a nalawa a subsidiya tapno masigurado a ti tulong ket makadanon kadagiti sektor a maibilang a vulnerable iti krisis.
Iti agdama, naiparuk-aten ti P3.5 bilyon para iti transportasion ken P10 bilyon para iti presidential assistance kadagiti sektor ti agrikultura ken panagkalap.
Malaksid iti transportasion ken taraon ket agtultuloy ti panangipaay ti tulong pinansial iti babaen ti programa nga Assistance to Individuals in Crisis Situation ken suporta para kadagiti Overseas Filipino Workers.
Inpasigurado ti Department of Budget and Management kadagiti agpanpanday linteg iti babaen da Speaker Bojie Dy III ken Representative Miro Quimbo a nakasagana ti gobierno a palawaen dagiti safety-net programs kas ti Tulong Panghanapbuhay sa Ating Disadvantaged/Displaced Workers no bilang kumaro pay ti situasion iti world market ti langis.
