LAOAG CITY – Napilaanen ti kaso gapu iti panaglabsing iti Republic Act No. 9165 wenno ti Comprehensive Dangerous Drugs Act of 2002 ti subject ti search operation iti Brgy. 17, Tabug iti siudad ti Batac a ni Michael Bulalayao pakairamanan ti asawana a ni Maylyn Bulalayao.
Nupay kasta, saan a karaman a napilaan ti kaso ti anakda a ni Princess Mae Bulalayao kalpasan a napaneknekan nga awan ti basol ti anakda agsipod ta naiyawat laeng kenkuana ti bag a nakaipalaonan dagiti naala a binulto a maipagarup a napagango a bulong ti marijuana.
Segun iti Imbestigador iti Philippine National Police iti siudad ti Batac, nagtalinaed dagiti agasawa iti kustudiar ti kuerpo ti pulisia bayat a maiyur-uray ti commitment order dagitoy a maipisok iti Bureau of Jail Management and Penology iti siudad ti Batac.
Maipalagip nga inpakaammo ni Police Lieutenant Colonel Adrian Gayuchan, ti Hepe iti Philippine National Police iti nasao a siudad a maibilang a maysa nga High Value Individual ti subject iti naisayangkat a search operation no sadino a datin a natiliw ti suspek iti buy-bust operation idi tawen 2021.
Naammoan a malaksid iti siudad ti Batac ket agop-operar pay iti paset iti ili ti San Nicolas ken ditoy siudad ti Laoag ti suspek.
Immuna iti daytoy, naala manipod iti suspek ti 10 nga heat sealed transparent plastic sachet a naglaon ti maatap a shabu nga agbalor ti 10,200 a pisos ken ti uppat a plastic bag a naglaon ti maipagarup a napagango a bulong ti marijuana nga aggatad ti 120 a ribu a pisos.
