LAOAG CITY – Kinumpirmaran ti Department of Justice (DOJ) a nangiruardan ti subpoena kadagiti indibidual a karaman iti anomalya iti flood control projects.
Daytoy ket iti lima a kaso nga insubli ti Office of the Ombudsman iti Department of Justice mainaig iti flood control anomaly idiay Bulacan.
Inbatad ni Prosecutor General Richard Anthony Fadullon, maiwayat met ti umuna nga imbestigasion iti kaso inton Nobiembre 10.
Inbatad ti Justice Department iti napalabas a lawas a karaman kadagiti mapaayaban ket dagiti dati a district engineers ti Department of Public Works and Highways (DPWH).
Partikular ditoyen da Henry Alcantara, Brice Hernandez ken Jaypee Mendoza.
Iti baet daytoy, kuna ti Department of Justice nga awan pay ti agdama a naelektaran nga opisial ti karaman iti imbestigasionda.
