LAOAG CITY – Paim-imbestigaran ni Presidente Ferdinand Marcos Jr. ti makunkuna a substandard wenno perdi a bollards a nakaikabil iti Ninoy Aquino International Airport (NAIA) Terminal 1.
Daytoy a pammilin ti Presidente kalpasan ti insidente no sadinno a dua nga indibidual ti natay pakairamanan ti maysa nga agtawen ti lima nga ubing a babai kalpasan a dinarusdos ti SUV.
Segun ken ni Presidential Communications Office Undersecretary Atty. Claire Castro, maladingitan ti gobierno iti insidente nangruna no mapaneknekan a dagiti bollards ket saan a simmurot iti nasken a pagannurotan para iti kinatalged.
Inbatadna a dagiti nasao a bollards ket naestablisar idi Hulio 2019 iti babaen ti napalabas nga administrasion kangrunaanna iti panawen ni dati a Department of Transportation Secretary Arthur Tugade.
Inlawlawagna nga iti pammilin ti Presidente, maim-imbestigaranen ti proseso ti procurement ken dagiti teknikal a detalye ti nasao a proyekto.
Kunana nga insigida a nabilin ni Secretary Vince Dizon nga idauloan ti panangtingiting iti agdama a bollards ken siguradoen ti alisto a panangsukat tapno masigurado ti kinatalged ti publiko.
Mainaig iti dayoy, inpakaammona a saan a palabsen ti administrasion ti aniaman a klase ti panagbaybay-a nangruna kadagiti adda ti pakainaiganna iti saan a nainkalintegan a kontrata ti gobierno.
Naammoan a no mapaneknekan ket mapagsungbat ti asinoman ken insigida a maipatungpal ti maiyannatop a tignay kas maiyataday iti linteg.
Basar iti inisyal a report, rumrummuar a naawanan ti kontrol ti driver ti SUV ken naidungpar iti bollards iti ruar ti eropuerto.
Kabayatanna, ti maysa kadagiti maitudtudo a rason iti posible a nangitunda ti insidente ket ti maipagarup a nakapsot a kalidad ti bollards a saan a nagbalin nga epektibo ti panangabbeng iti lugan.
