LAOAG CITY – Sumagmamano a balay ti nadadael kalpasan ti idadalapos ti napigsa nga alipugpug iti Purok Namnama, Barangay Naglicuan iti ili ti Pasuquin.
Daytoy ti kinumpirmaran ni Barangay Chairman Oliver Valite iti nadakamat a barangay.
Inlawlawag ni Valite a kalpasan a naamoan na ti napasamak ket napan a dagus iti nasao a lugar ken ditoy a nakita na dagiti naitayab a bubungan ti pito a balay no sadinno nga umab-abot iti 200 a metro ti kaadayo dagiti nakaitayaban da.
Malaksid iti daytoy, inpakaammo ti kapitan nga adda pay dagiti poon ti kayo ken sumagmamano a linya ti kuryente ti nadadael gapu iti idadalapos ti alipugpog iti nadakamat a barangay.
Gapu iti pannakapugsat dagiti sumagmamano a waya ken poste ti kuryente ket nagpukaw ti serbisyo ti kuryente iti nadakamat a barangay.
Nupay kasta, inpasigurado ni Valite a nagturong a dagus dagiti personnel ti Ilocos Norte Electric Cooperative tapno tarimaanen dagiti nadadael.
Iti baet daytoy, nagyaman ni Kapitan Valite gapu ta awan ti nadangran kadagiti kabarangayan na iti insidente.
Kabayatanna, inpakaammo ti kapitan a nagturong pay a dagus iti lugar tapno mai-dokumento ti napasamak dagiti kameng ti Municipal Social Welfare and Development (MSWD) ken Municipal Disaster Risk Reduction and Management Council (MDRRMC) iti ili ti Pasuquin.
