LAOAG CITY – Inpakaammo ti maysa nga Filipina iti Yangon, Myanmar a mabutbuteng dan nga agusar iti Facebook application kalpasan nga inpawil ti militar gapu iti kudeta.
Iti pannakiuman ti Bombo Radyo Laoag ti Filipina a nagpainagan laeng iti Mylene,tubo iti Manila, babaen ti messenger, mabuteng nga agpost iti online mainaig iti sitwasyon iti nasao a pagilian.
Inlawlawag na a possible a maipan da iti alanganin a sitwasyon no matrace dagiti otoridad iti panagpost daytoy.
Nupay kasta, naulimek ti aglawlaw da gapu iti kudeta idinto a naibalakad kadakuada a Pilipino a saan unay agruruwar iti pagtaengan tapno maliklikan iti anyaman a mapasamak kadakuada.
Kinumpirmaran ni Mylene a ti panagtrabaho dagiti dadduma a Pilipino ket naka work from home idinto nga adda dagiti sumagmamano nga expats a makapagtrabaho iti opisina.
Innayon na nga atultuloy met ti transportasyon iti Yangon kadagiti highway idinto a sumagmamano laeng dagiti lugan kadagiti dadduma a kalkalsada.
