LAOAG CITY – Nakapasan iti maikadwa a pannakaibasa na iti kamara de representantes ti gakat a nakatutuk iti pannakapaiget ti pagsayaatan, dignidad ken inklusyon iti komunidad dagiti senior citizens ken Persons With Disabilities (PWDs).
Ti House Bill 10188 wenno Senior Citizens Protection Against Fraud Act nga inisponsoran ni Muntinlupa City Rep. Jaime Fresnedi, ket gagem na a mangestablisar kadagiti mekanismo tapno masursurwan ken maiwanwan dagiti senior citizen kadagiti impormasyon mainaig iti nagduduma a klase ti panangswitik ken panangluko.
Iti babaen ti nasao a gakat ket nabilin ti Department of the Interior and Local Government (DILGI iti babaen dagiti lokal a gobierno a sursurwan dagiti senior citizens, karaman dagiti pamilya da ken mangtartaripato kadakuada iti naan-anay nga impormasyon iti mail, telemarketing ken internet frauds, pakairamanan ditoyen dagiti impormasyon no sadinno ti mabalin da a pangidatagan ti reklamo ken no kasanu da a maliklikan dagiti kastoy a kaso.
Maipalagip nga addan ti tallo a gakat para iti pagsayaatan dagiti Persons with Disabilities ken senior citizenz nga immuna a naipasa iti maikadwa a panagbasa iti kamara de representante.
Umuna ket ti House Bill 10312 a mangimanmandar a ti diskwento a 20% a pribilehiyo ket agtalinaed para kadagiti senior citizens ken persons with disabilities (PWDs) uray dagiti produkto a mailaklako wenno magatang ket nakapromo.
Maikadwa ket ti House Bill 10313 a mangipatpatungpal ti eGov Super App; ken House Bill 10314 a para iti rationalization dagiti benepisyo ken dagiti pribilehiyo dagiti senior citizens ken persons with disabilities.
