LAOAG CITY – Maproblemaan dagiti sumagmamano a jeepney driver ti ruta a Laoag-Burgos gapu iti maipagarup a panag-cutting trip dagiti sumagmamano a bus nga addaan ti ruta a Vigan-Pagudpud.
Segun ken ni Mr. Mark Anthony Gaviola, Operation Manager ti Gaviola Transport Corporation ti Laoag-Burgos, nagreklamoda iti Land Transportation Office gapu ta imbes nga agdiretso dagitoy iti siudad ti Vigan idiay Ilocos Sur ket agpatinggada laeng ditoy siudad ti Laoag.
Inbatadna a malaksid laeng iti panag-cutting trip-da ket nagipababada pay ti plete no sadinno a manipud iti 90 a pisos a regular fare ket pinagbalinda a 50 a pisos banag a dakkel a padagsen daytoy kadakuada.
Inlawlawagna a bagbagaan met ti Land Transportation Office dagiti maseknan a bus drivers ngem arig saanda nga ikankano dagiti balakad ti nasao nga ahensia.
Kunana a saan a sardengan dagiti personnel ti Land Transportation Office dagitoy agingga a saanda nga agdiretso iti naikeddeng a rutada.
Inpettengna nga awan ti karebbenganda nga agala ti pasaheroda ditoy siudad ti Laoag gapu ta ti rutada ket Vigan-Pagudpud a saan ketdi a Laoag-Pagudpud.
Mainaig iti daytoy, inpakaammo ni Gaviola a mangipilada ti reklamo iti Land Transportation Franchising and Regulatory Board iti Region 1 ken Central Office a no maipursige daytoy ket mabalin a masuspenso wenno maikkatanda ti franchise.
Innayonna a dakkel ti epektona kadakuada a jeepney drivers daytoy nga arungaingda nangruna ket maag-agawanda dagiti aglugan a pasahero.
Kabayatanna, naammoan nga adda ti agarup 15 a bus nga addaan ti ruta a Vigan-Pagudpud a mamitlo wenno maminpat a daras dagitoy nga agsubli-subli tapno agilugan kadagiti pasahero ditoy siudad ti Laoag.
Immuna iti daytoy, adda dagiti sumagmamano a jeepney drivers ti nagreklamo babaen iti ipa-Bombo segment ti Bombo Radyo Laoag nga adda dagiti sumagmamano a bus nga addaan ti ruta a Vigan-Pagudpud a maipagarup nga agkat-cutting trip ditoy siudad ti Laoag.
