LAOAG CITY – Kalikagom dagiti sumagmamano a jeepney drivers ditoy probinsya a maipangato ti plete gapo iti agtultuloy met a panagngato ti presyo dagiti produkto a petrolyo.
Segun kenni Mr. Aldo Casimiro, jeepney driver iti ruta a Laoag-Batac-Paoay, nabayagen idi naudi a naipangato ti plete ti jeepney ken no bilang mapatgan ti kalikagom da ket makaabrot da met.
Inlawlawag na a gapo iti linawas a panaggaraw ti presyo ti krudo ket bassit laeng ti mapasadaan da nangruna ket awan pay unay ti pasaheros no dadduma.
Kunana nga iti sangaribo a pisos nga ikrudo da ket mamitlo laeng a byahe daytoy.
Mainaig iti daytoy, naamoan a ti plete ti estudyante manipud MMSU-Batac agingga iti Laoag ket 25 pesos idinto a 30 pesos met no regular; ken no manipud Paoay agingga iti Laoag ket 35 pesos ti estudyante ken 40 pesos ti regular.
Kabayatanna, kalikagom pay ni Casimiro nga agtataripnong da kadagiti opisyal ti asosasyon tapno mapagsasaritaan da daytoy a banag.
