LAOAG CITY – Maladingitan ti maysa kadagiti kameng ti Sangguniang Panlungsod ditoy siudad ti Laoag iti pannakaiwayat ti vote buying ditoy probinsia.
Segun iti opisial, isuna a mismo ti nakaimatang ti maysa a pannakaibunong ti kuarta.
Inbatadna a maus-usar pay dagiti barangay hall kadagitoy nga aktibidad.
Inlawlawagna a malaksid ditoy siudad ket adda pay ti kapada a pasamak iti sabali nga ili apaman a nagsursor isuna.
Kunana a dumanon iti 2,500 a pisos agingga iti sangapulo a ribu a pisos ti ibunbunong dagiti kandidato.
Mainaig iti daytoy, inpakaammona nga adda ti kinapudnona nga adda dagiti kameng ti Philippine National Police ditoy probinsia nga agbalbalin a partisan gapu ta isuda a mismo ti mangprotehir kadagitoy a pasamak.
Inpettengna nga iti kallabes nga eleksion ket inpasiguradona nga adda manen ti maipatungpal a curfew hours no sadinno a daytoy ti gundawayan dagiti kandidato a mangisayangkat ti vote buying ken kuyugen ti Philippine National Police.
Masdaaw ti opisial gapu ta iti sabali a lugar ditoy pagilian ket addan dagiti naipila a disqualification case ken show cause order kadagiti kandidato gapu iti vote buying ngem ditoy probinsia ket awan iti baet nga adu ti kastoy a mapaspasamak.
Innayonna a malaksid kadagiti kameng ti Philippine National Police ken adda payen dagiti sumagmamano a media personality ditoy probinsia nga agbalbalin a partisan.
