LAOAG CITY – Nagballaag ti Meteorological Department iti Malawi a makapasar ti sumagmamano a lugar iti central ken northern region iti nasao a pagilyan ti layos isut gapuna a ginutigot na dagiti residente nga agridam.
Segun iti Department of Climate Change and Meteorological Services forecast, makapasar dagiti nasao a lugar ti napigsa a tudo, panagkimat ken panaggurruud.
Karaman kadagiti kangrunaan a naballaagan ket dagiti residente iti ciudad ti Lilongwe ken nababa a lugar idiay Malawi gapu ta isu ti possible a dupraken ti napigsa a layos.
Maipalagip nga agpapan ita ket saan pay a naan-anay a nakabangon ti Malawi manipud iti iduduprak ti tropical storm Ana iti kallabes a nakatayan ti 32 a tattao, nakadadaelan ti linya ti kuryente ken ado a sanikua ken imprastraktura.
Immunan nga immapela ni President Lazarus Chakwera iti suporta ken tulong ti international community para iti al-alisto nga ibabangon ti pagilyan da manipud iti nagpasaran da a didigra.
