LAOAG CITY – Maproblemaan dagiti sumagmamano a mannalon iti ili ti San Nicolas gapu ta marigatan iti panaguli ti danom kadagiti mulada.
Segun ken ni Mr. Roberto Corpuz, Bise Presidente ti Bongga Pump 2, daytoy ket kalpasan a nalabes unayen ti maiwaywayat a quarry operation iti asideg ti lugarda.
Inbatadna nga adda metten ti panagsasaritada maipanggep iti daytoy a banag ken napagnunumoanda nga addanto ti maikabil a paglasinan ti pagpatinggaan ti mabalin a pangiwayatanda ti panag-quarry inton Enero 21.
Inlawlawagna a dakkel ti epektona kadakuada ti pannakaitantan ti panagmulada isu a nasayaat no dagus a maipakat ti napagtutulaganda.
Kunana a kadagitoy laeng a gundaway a napasaranda ti nabayag a panaguli ti danom isu nga adu ti naapektaran a mannalon.
Innayonna a dumanon iti 350 nga ektaria ti kalawa ti nagmulaanda ti pagay para iti contract farming.
