LAOAG CITY – Inbatad ni Deputy Speaker at Antipolo Representative Ronaldo Puno, chairman ti National Unity Party (NUP), nga adda ti sumagmamano a miyembro ti partido a saan a maragsakan iti liderato ni House Speaker Bojie Dy gapu iti agtultuloy a pannakaitantan ti pannakaiparuk-at ti pondo para kadagiti proyekto ti distrito.
Segun ken ni Puno, nadismaya ti sumagmamano a kongresista kalpasan a naduktalan a minarkaan ti Department of Budget and Management (DBM) ti sumagmamano a pondo para iti district projects kas “for later release,” a nangitunda ti panagamak iti implementasyon kadagiti programa a nailatang para kadagiti masakupan da a distrito.
Inrakurak na pay a pagsasaritaan dagiti miembro ti partido da iti panawen ti congressional break no agtalinaed da pay iti House Majority wenno bumaba da kadagiti posisyon da iti liderato ti kamara de representantes kas sungbat iti isyu.
Inlawlawag met ni Puno a naisina ti isyu ti pondo iti posisyon da mainaig iti impeachment case kontra ken ni Vice President Sara Duterte.
Inpetteng na a kayat laeng ti grupo da a masigurado nga adda ti umdas ken natibker a pagibasaran ti aniaman nga addang nga adda ti pakainaigan ti nasao a kaso.
