LAOAG CITY – Nauram ti sumagmamano a mula iti babaen ti National Greening Program ti Department of Environment and Natural Resources iti Barangay Poblacion iti ili ti Nueva Era.
Gapu iti daytoy, nagkiddaw ni Mr. Efraim Castillo Marcos, Environmental Management Specialist I, Officer-In-Charge ti Municipal Environment and Natural Resources Office iti ili ti Nueva Era ti tulong gapu iti napasamak a forest fire.
Insigida a nagturong iti lugar dagiti kameng ti Nueva Era Municipal Police Station, Bureau of Fire Protection, Municipal Environment and Natural Resources Office, barangay officials ken dagiti Barangay Forest Rangers.
Naammoan a dagiti nairaman a nauram a mula ket dagiti narra, molave ken gimelina.
Alisto a nagramram ti apoy gapu iti naangin a paniempo iti kabanbantayan.
Iti agdama, agtultuloy ti iwaywayat nga imbestigasion dagiti otoridad ti namunganayan ken ti kinalawa ti uram.
