LAOAG CITY – Kinumpirmaran ni Police Lt. Col. Mar Louise Bondoc, ti chief of police ditoy ciudad ti Laoag nga adda dagiti sumagmamano a pagtagilakoan nga adda iti asideg dagiti pagadalan a sinita da.
Daytoy ket gapu iti panaglaklako da kadagiti maipawil para kadagiti estudyante kas ti arak, sigarilyo ken dadduma pay.
Inbatad ni Bondoc a naduktalan da daytoy kabayatan ti panagsursur ken panaginspeksyon da kadagiti pagtagilakoan nga adda iti asideg dagiti pagadalan ditoy ciudad ti Laoag.
Inpetteng ni Bondoc a saan koma a lakoan dagiti estudyante ti sigarilyo ken arak gapu ta agad-adal pay laeng dagitoy.
Agamak ni Bondoc amangan no padasen to payen dagiti estudyante ti agsusop ti illegal a droga.
Mainaig ti daytoy, kuna ni Bondoc nga adda pay dagiti naaktwan da iti kallabes a nasurok a 10 a menor de edad nga aggiinom iti maysa a pasdek iti sentro ditoy ciudad ti Laoag.
