LAOAG CITY – Sumagmamano kadagiti residente ditoy Ilocos Norte ti naibakwiten kadagiti evacuation centers gapu iti agtultuloy a pannakapasar ti napigsa a tudo gubuay ti Bagyo Carina.
Daytoy ti inpakaammo ni Mr. Marcel Tabije, mangidadaulo iti Provincial Disaster Risk Reduction Office ditoy probinsia.
Inbatadna nga adda ti 9 a pamilia ti naibakwit iti evacuation centers kadagiti bukodda a lugar, no sadinno 5 a pamilia ket manipud iti Brgy. Catagtaguen iti ili ti Banna, 2 a pamilia manipud iti Brgy. 7-B ditoy ciudad ti Laoag ken 2 a pamilia manipud iti Brgy. 32-C Lapaz ditoy ciudad.
Mainaig iti dayoy, ket buklen ti 6 nga indibidual ti 5 a pamlia manipud iti Brgy. Brgy. Catagtaguen iti ili ti Banna, buklen 9 nga indibidual ti 2 a pamilia manipud iti Brgy. 7-B ditoy ciudad ti Laoag ken buklen ti 12 nga indibidual ti 2 a pamilia manipud iti Brgy. 32-C Lapaz ditoy ciudad.
Innayonna ti imprastraktura a naperdi iti slope protection iti San Mateo bridge a mamagkamang ditoy ciudad ti Laoag ken ili ti Sarrat no sadinno saan pay a masinuno ti gatad ti nadadael iti nadakamat a banag.
Inpakaammona, a manamnama nga agpatpatnag nga agbantay ti Provincial Disaster Risk Reduction Management Office pakairamanan dagiti kameng ti Philippine National Police, Bureau of Fire Protection, Philippine Coast Guard ti Ilocos Norte ken Philippine Army.
Kinunana nga adda iti naka-standby a maysa a rubber boat iti sanguanan ti kapitolyo probinsial, maysa iti marcos stadium, dump truck, pay loader ken back hoe iti naka-preposition ti Provincial Engineering Office.
Kabayatanna, segun ken ni Ms. Rochelle Gajes, mangidaddaulo iti Provincial Social Welfare and Development Office nga adda iti nasurok dua ribo a family food packs ti available iti opisinada.
Nupay kasta, kinunana nga awan pay ti aniaman nga impormasion a dimmanon iti opisinada nga agkidkidaw iti pannakairuar ti dadduma a stock-da.
Inlawlawagna a ti proseso ti panagipaay kadagiti family food packs ket mangrugi iti barangay, sumaruno iti lokal a gobierno sakbay nga adda ti augmentation iti probinsia.
Inpakammona, no adda dagiti dumanon iti opisinada ket sisisaganada a mangipaay nga inisigida iti relief goods.
