LAOAG CITY – Nagsisina ti sumagmamano a paset ti bagi ti nakamotorsiklo kalpasan a naidungpar iti poste ti bypass road iti Barangay Vira ditoy siudad ti Laoag.
Ti biktima ket agtawen ti 23, tubo iti ili ti Pinili ngem agdama nga agnanaed iti Barangay Vira ditoy siudad ti Laoag ken agtrabtrabaho kas maysa a security guard iti maysa a dakkel a mall.
Naammoan a maysa a saka ken ima ti biktima ti naisina gapu iti kinapigsa ti impact ti desgrasia.
Mainaig iti daytoy, rumrummuar a posible a nakaturog ti biktima a nangitunda no apay a napukawan daytoy ti kontrol ti manibela.
Kabayatanna, basar iti nakalap nga impormasion ti Bombo Radyo Laoag News Team a ti biktima ket kapaspasana laeng iti Criminologists Licensure Examination.
Iti agdama, agtultuloy ti iwaywayat a naun-uneg nga imbestigasion dagiti otoridad maipanggep iti napasamak a desgrasia.
