LAOAG CITY – Inlawlawag ni Mrs. Antonette Bareng, mangidadaulo ti Bussiness Permit and Licensing Office ditoy siudad ti Laoag a saanda a limitaran ti panangipaay ti bussiness permit kadagiti peddlers ditoy siudad.
Daytoy ket kalpasan nga adu pay dagiti peddlers nga awan ti business permit-na kangrunaanna dagiti aglaklako iti sango ti Mariano Marcos State University – College of Teacher Education.
Inbatad ni Bareng nga addan ti umuna a pannakisarsaritana iti Kapitan iti Barangay 5 tapno agtitinnulong dagitoy a makaala ti business permit dagiti peddlers.
Kunana nga insigida a nagturong dagiti peddlers iti opisinada tapno mangala ti business permit.
Mainaig iti daytoy, inpakaammona a nasken a nakapuesto dagiti maseknan a peddlers iti umiso a lugar.
Innayonna ni Bareng nga iti agdama ket addan iti 104 a peddlers ti nakaala ti bussiness permit-na.
