![](https://img.bomboradyo.com/laoag/2019/04/Illegal-Gamling.jpg)
LAOAG CITY – Natiliw dagiti sumagmamano a personalidad babaen iti naiyuswat nga operasyon dagiti kameng ti PNP-Vintar mainaig iti iligal a panagsusugal iti paset ti Barangay 17, Alviar iti nasao nga ili.
Nabigbig dagiti suspek a da Crisanta Agliam y Lopez, 39; Benilda Reyes y Agpalza, 59, agpada a residente iti nasao a barangay; kasta met da Olivia Cadang y Costales, 60, residente iti Brgy. 16, Salsalamagui iti nasao nga ili.
Karaman kadagiti natiliw ket ni Barangay Kagawad Randolf Abad y Cabacungan, 28, ken ti ama na a ni Amor Abad Jr. y Magayano, 56, agpada a mannalon ken residente met laeng iti nasao a lugar.
Naamoan a ginandat pay ti barangay kagawad ti aglibas ngem dagus met laeng natiliw dagiti nagresponde a pulis.
Ummuna iti daytoy, adda ti naawat ti pulisya a report seknan iti panagsusugal dagiti suspek ken idi nakadanon da iti lugar ket naaktuan da a mismo nga agay-ayam dagitoy ti tong-it.
Nakumpiskar dagiti otoridad ti maysa a set ti baraha, pusta nga agdagop ti 785 a pisos, maysa a lamisaan, tallo a monoblock chair, ken dua a pidaso a folded chair.
Gapo iti daytoy, naipadalan dagiti natiliw iti medical examination iti Gov. Roque Ablan Memorial Hospital ditoy ciudad ti Laoag.
Nagtalinaed met dagitoy iti kustudiyar ti PNP-Vintar.