LAOAG CITY – Naibakwiten dagiti sumagmamano a Pilipino nga agtrabtrabaho iti asideg ti Cambodia-Thailand border gapu iti kumarkaro a rinnupak ti dua a pagilian.
Segun ken ni Bombo International News Correspondent Toto Cadapan manipud idiay Thailand, temporario a nakipagnaed dagiti sumagmamano a Pilipino kadagiti pagayamda idinto a dagiti dadduma ket nagturong kadagiti shelter nga inpaay ti gobierno.
Inbatadna a dumanonen iti agarup 200 a ribu nga indibidual ti naibakwiten iti nagbedngan ti Cambodia ken Thailand pakairamanan dagiti sumagmamano a Pilipino.
Inlawlawagna a manarimaan ti pannakikoordinar ti embahada ti Pilipinas iti Migrant Workers Office idiay Thailand tapno maipasigurado a natalged dagiti Pilipino ken maiyadayo dagitoy iti mapaspasamak a riribuk.
Kunana nga adda ti agarup 200 a mangisursuro iti 600 a pagadalan nga asideg iti rinnupak ti dua a pagilian ti kangrunaan a naapektaran gapu iti panagsinnukatda kadagiti airstrikes ken rockets.
Mainaig iti daytoy, inpakaammo ni Cadapan nga iti baet ti bumarbara a situasion idiay Thailand ket ad-adda pay laeng a pinili dagiti sumagmamano a Pilipino ti agtalinaed ngem agawid ditoy Pilipinas.
Maipalagip nga addan ti sumurok 40 ti nairekord a natayen iti dua a pagilian ken adda ti sumurok 300 a ribu a sibilian ti agdama nga adda kadagiti temporary evacuation.
Kabayatanna, kuna ni Cadapan a magagaran dagiti Pilipino idiay Thailand a mabuya dagiti pambato nga atleta ti Pilipinas para iti 33rd Southeast Asian Games.
