LAOAG CITY – Mapatta-patta nga umabot iti sumurok 31 a ribu a trabaho para kadagiti skilled worker ti napartuat iti babaen ti dua a kangrunaan a proyekto ti Department of Transportation (DOTr) kas maiyallubog iti pammilin ni Presidente Ferdinand Marcos Jr. a siguradoen nga ad-adu a Pilipino ti mabenepisiaran kadagiti oportunidad iti uneg ti pagilian.
Inbatad ni Presidential Communications Office (PCO) Undersecretary ken Palace Press Officer Claire Castro a basar iti report ni Transportation Secretary Giovanni Lopez, aktibo a gutgutigoten ti ahensia dagiti gangannaet a kontratista ti North-South Commuter Railway ken Metro Manila Subway Project a mangala kadagiti Pilipino nga inhinyero, arkitekto ken dadduma pay nga skilled worker para iti pannakaipatungpal kadagitoy a proyekto.
Naammoan a no nakumpleton ti amin a 35 nga istasion ti North-South Commuter Railway, manamnama nga agpaut laeng ti dua nga oras ti biahe manipud idiay Clark, Pampanga agingga Calamba, Laguna.
Manamnama a mabenepisiaran ti agingga 800 a ribu a pasahero iti kada aldaw.
