LAOAG CITY – Kalikagom dagiti sumagmamano kadagiti quarry permittee ditoy probinsya a 10 a pisos laeng ti environmental fee imbes a 15 a pisos.
Daytoy ti indasar ni Sang. Panlalawigan Member Saul Lazo, ti chairman ti Committee on Laws kabayatan ti pannakaidasar met ti lungalong a mabalbaliwan ti revenue code partikular iti probinsya mainaig iti quarry.
Inbatad na a kabayatan ti pannakisarita da kadagiti quarry permittee ken adda dagiti nagkiddaw nga agbalin a 10 a pisos ti environmental fee malaksid laeng iti aggregates fee.
Inlawlawag met ni Sang. Panlalawigan Member Hanson Chua nga adda laeng ti tallo manipud kadagiti quarry permittee ditoy probinsya ti saan nga umanamong ken dagiti dadduma ket awan met ti reklamo da.
Nupay kasta, ti nasao a lungalong ket naipasan iti maikadua a pannakaibasa na.
Mainaig iti daytoy, kuna ni Chua a ti pannakaipangato ti bayadan dagiti quarry permittee iti kada cubic meter nga aggregates nga alaen da ket para iti napinpintas nga implementasyon dagiti proyekto ken programa nangruna ket Ilocos Norte ti kababan ti koleksyon iti Rehiyon Uno.
