LAOAG CITY – Naalarma dagiti residente iti Sitio 7, Barangay Nalbo ditoy ciudad ti Laoag kalpasan a nakita da ti maysa a gadget nga inpagarop da a maysa a bomba a nakakabit iti linya ti Prime Water a nakakonektar iti maysa a balay iti nasao a barangay.
Segun ken ni Barangay Kagawad Norman Respicio, inpakaammo kenkuana ti kasinsina na a nakita na dagiti innem a lallaki a napan iti lugar ken nagal-alisto da a nangikabit ti nasao a banag.
Inbatad na nga itay bigat ket nakita da daytoy nga adda ti timer na isut gapu na a naalarma da kadagiti kalugaran na ket napanda iti covered court ti nasao a barangay.
Naamoan a saan a nagpakada dagiti empleado ti Prime water iti panagikabit da ti nasao a gadget.
Innayon ni Respicio nga uray dagiti sumagmamano a pulis a nagresponde iti lugar ket nagamak da nga umasideg iti nasao a banag.
