LAOAG CITY – Saan a malappedan dagiti senador-judges nga agsao iti wagas a saan a makaay-ayo wenno maitunos iti impeachment court nupay adda ruling nga inruar ni presiding officer Chiz Escudero.
Daytoy ket iti laksid ti panangipaulog ni Escudero iti ruling iti nainget a panangtungpal dagiti senador judges, prosecution and defense lawyers iti sub judice rule, ken uray ti respondent iti kaso nga agannad kadagiti balikas nga inusarda tapno mataginayon ti integridad ken dignidad ti korte.
Bayat ti panagtultuloy ti Day 19 ti impeachment trial, inladawan ni Senador-judge Ping Lacson nga “stupid” ti listaan dagiti confidential activities para iti pannakaaramat ti confidential funds ti Office of the Vice President (OVP) nga inaramidna iti baet ti panagkuestionna iti maikadua a prosecution hostile witness, ni OVP Assistant Chief of Staff Lemuel Ortonio.
Impasingked ni Lacson nga insulto daytoy iti “common sense” a saan pay ketdi a nabaliwan dagiti aktibidad iti babaen ti pisikal ken pinansial a plano para kadagiti confidential funds ngem ketdi, na-copy-past laeng dagitoy.
Kabayatanna, kinuna ni Senador-judge Raffy Tulfo nga agpampammarang laeng a maag ni Ortonio iti sungbatna iti impeachment court.
Kuestionaran ni Tulfo no apay a saan pay a sinukimat ni Ortonio dagiti impormer no talaga a masakitda ken no talaga a naaramat ti confidential funds a paggatang iti agas, nangruna ta ni Ortonio ti nagpirma iti audit observation memorandum (AOM).
Sarkastiko met nga inawagan ni Tulfo ni Ortonio iti “Mr. Smart Guy” ket para kenkuana, saan a mapagtalkan ta awan ti logic-na ken sayang ti kinasiribna.
