LAOAG CITY – Mamati dagiti sumagmamano a Senador a good choice ni Senador Sonny Angara kas sekretario ti Department of Education kasukat ti nag-resign a ni Vice President Sara Duterte.
Segun ken ni Senate President Francis “Chiz” Escudero, excellent choice kas Secretary ti Department of Education ni Angara.
Inbatadna a sumagmamano nga asideg iti Presidente ti nagsaludsod kenkuana no asino ti rumbeng nga agbalin a sektertario ken ti laeng napanunut ken nadakamatna ket ni Angara.
Para met ken ni Senador JV Ejercito, good choice kas Department of Education Secretary ni Angara ken mangnamnama isuna a maikonsiderar ti maseknan a Senador.
Inlawlawagna a saan daytoy a sigurado no awaten ni Angara ti posision nga agbalin a dakkel a karit kenkuana.
Kabayatanna, impetteng met ni Senador Sherwin Gatchalian, Chairman ti Senate Committee on Basic Education a makatartrabahona met iti 2nd Congressional Commission on Education o EDCOM 2 ni Angara isu nga ammona a good choice daytoy iti posision.
Maipalagip a naglusulos iti puesto kas Department of Education (DepEd) Secretary ni Vice President Sara Duterte-Carpio.
Basar iti Presidential Communications Office, simmangpet iti Palasyo ni Vice President Sara alas-2:21 ti malem idi Hunio 19 ken inpasana ti panagbabana iti puesto kas miembro ti Gabinete kas Department of Education Secretary ken Vice Chairperson ti National Task Force to End Local Communist Armed Conflict (NTF-ELCAC).
