LAOAG CITY – Kinumpirmaran ni Mr. Reynaldo Calixto, treasurer iti ruta a Laoag-Gabu Terminal nga adon a traditional jeepney drivers ti nagsardeng nga agpasada.
Segun kenni Calixto, ti kangrunaan a rason dagiti drivers ket ti modernization program.
Kunana nga adda pay dagiti naamoan na a nailako a traditional jeepney.
Inbatad na nga iti ruta a Loaoag-Gabu, 95 laeng ti naka-consolidate para iti modernization programa ken isu met ti bilang ti agdama nga agpaspasada iti daytoy a gundaway no ikumpara idi a 170 da.
Inlawlawag na nga iti agdama ket kimmapsot ti mapasadaan da.
Mainaig iti daytoy, kunana nga adda dagiti ayuda idi a naawat da ngem no mainaig iti manamnama a pannakaipatungpal ti modernization program ket awan pay ti naawat da manipud iti lokal a gobierno ti Laoag ken ti gobierno probinsyal.
Mangnamnama a saan a matuloy ti pannakaimplementar ti modernization program gapo ta kakaasi da a tradional jeepney drivers.
Kabayatanna, kunana a ti kangrunaan a kalikagom da ket ti saan a panagpick-up dagiti tricycle drivers iti national road.
Ummuna iti daytoy, adda dagiti nagkamang kenni Vice Mayor Carlos Fariñas a marigatan da nga agawid gapo iti kaawan ti pagluganan da a jeep kangrunaan na kadagiti sumrek iti barangay.
