LAOAG CITY – Nagpila ti petisyon iti Korte Suprema ti sumagmamano nga abogado ken indibidual iti panangidaulo ni Atty. Israelito Torreon kontra iti Committee on Justice ti kamara de representantes.
Kwinestyunaran da ti legalidad wenno panagbalin a maiyataday iti konstitusyon iti maiyus-uswat a panagdengngeg wenno panangiproseso iti ‘impeachment’ kontra ken ni Vice President Sara Duterte.
Partikular nga inpila da Atty. Torreon, Atty. Martin Delgra III, Atty. Victor Rodriguez ken dadduma pay ti ‘petition for certiorari and prohibition’ kagiddan ti kiddaw a mangisyu ti Korte Suprema ti Temporary Restraining Order.
Kalikagom da a malawlawagan iti Korte Suprema no mabalin pay nga ituloy ti komite ti panagdengngeg kadagiti reklamo nga ‘impeachment’ kontra iti bise presidente.
Karaman pay kadagiti kiniddaw dagiti petisyoner a malapdan ti kongreso a bigbigen ti maikatlo ken maikapat nga impeachment complaints iti panagbalin a sufficient in substance ken sufficient in grounds.
Uray ti implementasyon ken panangisyu ti nayun a ‘subpoena, direktiba wenno pammilin ken kiniddaw pay dagiti petisyoner a maisardeng ken saan a maipatungpal.
Naisumitir ti nasao a petisyon iti Korte Suprema iti babaen ti ‘online submission wenno e-filing’ iti website ti kangatoan a korte.
