LAOAG CITY – Inpakammo ni Mr. Dominador Alberto, senior trade and industry specialist ti Department of Trade and Inudstry ditoy probinsya ti agtultuloy a panangimbestigar dagiti otoridad dagiti rice dealers a nagipangato ti presyo ti bagas.
Kuna na a babaen ti panagsursur ti grupo na kadagiti merkado publiko iti siudad ti Batac, kadua da dagiti pannakabagi ti National Bureau of Investigation ket adda ti 10 a rice retailers ti naduktalan a nagipangato ti presyo ti lako da a bagas.
Inbatad ni Alberto a ti rason a nagipangato ti presyo ti bagas iti kada kilo dagiti maseknan ket gapu ti ngimmato a presyo iti kada sako a 25 kilograms.
Maipagarup a naipangato iti 120 a pisos ti kada sako manipud iti suggested reatail price.
Inpakaammo na a kinasarita dagiti otoridad dagiti rice retailers ken sumaruno a kasarita da dagiti maseknan a rice dealers.
Agdepende iti nabukel a grupo a mangtingiting ti maiyannatop a pannusa a maipataw kadagiti naduktalan a nagipangato ti presyo ti bagas.
Nupay kasta, binalakadan ni Alberto dagiti aglaklako ti bagas ti panangsurot da ti price freeze kageddan ti pannakaipatungpal ti public health emergency.
Innayon na nga agtultuloy ti pannakamonitor dagiti aglaklako nangruna no agipangato da ti presyo kadagiti lako da.
