LAOAG CITY – Nakipagmaymaysa dagiti sumagmamano nga agpanpanday-linteg iti awag ti Integrated Bar of the Philippines (IBP) Davao City Chapter ken ni Pastor Apollo Quiboloy ken dagiti kakaduana a sumuko a sitatalna ken agtulnog iti linteg.
Segun ken ni 1-Rider Party-list Representative Rodge Gutierrez, saan laeng a ti panagtulnog iti linteg no di ket panangipakita iti panagraem iti sistema ti hustisia ken due process.
Impalagip met ni Ako Bicol Representative Jil Bongalon a napateg a paset ti demokrasia ti turay ti linteg ken awan ti siasinno man nga adda iti ngato ti linteg.
Sinuportaran daytoy ni Deputy Majority Leader Janette Garin ket kinunana a ti panagsuko ni Quiboloy ket mangtaginayon iti panagtalek ti publiko iti legal a sistema.
Immanamong met ni Deputy Majority Leader Jude Acidre ti sungbat ni dati a Senador Leila De Lima iti palawag ni dati a Presidente Rodrigo Duterte mainaig iti nasao nga isyu.
Kinuna ni Acidre nga imbes a kondenaren ti pannakaipatungpal ti legal arrest warrant, tulongan laengen ti dati a Presidente dagiti otoridad a mangparmek ken ni Quiboloy.
