LAOAG CITY – Nagannunsio ti sumagmamano nga airline ditoy Pilipinas ti pannakakanselar kadagiti flight-da nga agturong kadagiti sabali a pagilian iti Middle East agingga inton Marso 5 gapu iti kumarkaro a riribok iti rehion kagiddan ti rinnupak ti Estados Unidos, Israel ken Iran.
Basar iti Civil Aviation Authority of the Philippines (CAAP), nagkanselar ti Cebu Pacific dagiti flight daytoy idiay Dubai agingga inton Marso 4 idinto nga idiay Riyadh ket agingga inton Marso 5.
Kabayatanna, nangipatungpal ti Philippine Airlines (PAL) ken Cebu Pacific ti pannakakanselar dagiti biahe nga agturong idiay Riyadh, Doha ken Dubai.
Karaman kadagiti nakanselar a biahe ti flight manipud idiay Davao nga agturong idiay Doha, Qatar.
Nagannunsio met ti Emirates ti pannakakanselar dagiti flight daytoy nga agturong ken agsubli iti Dubai; ti Etihad Airways ket nagkanselar kadagiti biahe nga agturong ken agsubli iti Abu Dhabi ken ti Kuwait Airways ket nangipatungpal met ti pannakakanselar dagiti flight nga agturong ken agsubli iti Kuwait.
Iti agdama, umaboten iti 42 ti pakabuklan a bilang ti nakanselar a flight nga agturong iti Middle East idinto a tallo ti na-divert.
Immunan nga inrakurak ni Civil Aviation Authority of the Philippines Director General Raul del Rosario nga agtultuloy ti monitoring dagitoy iti situasion iti Middle East ken manarimaan ti pannakikoordinarda kadagiti airline, airport authorities ken international aviation partners gapu iti kumarkaro a tension iti Middle East.
