LAOAG CITY – Nakipaset ti sumagmamano nga establisimiento ken ti lokal a gobierno ditoy ciudad ti Laoag iti Earth Hour ita a rabii.
Ti Earth Hour ket nangrugi iti oras iti alas-8:30 agingga iti alas-9:30 ita a rabii.
Iti panagsursur ti news team ti Bombo Radyo Laoag aglalo iti sentro ditoy ciudad ket naiddep ti silaw iti Aurora Park, City Hall, dadduma nga establisimiento ken dagiti babbalay.
Nupay kasta, naobserbaran ti news team ti Bombo Radyo Laoag a saan a nakipaset ti kapitolyo probisyal iti Earth Hour.
Tinawen a maiyus-uswat ti earth hour wenno ti panagiddep ti silaw iti uneg ti maysa nga oras, a daytoy ket dakkel a makatulong iti panangtagiben iti aglawlaw.
