LAOAG CITY – Ibilang ni Doctor Melvin Manuel, ti mangidadaulo iti City Disaster Risk Reduction and Management Council a nagasat ditoy ciudad ti Laoag ken ti intero a probinsya ti Ilocos Norte gapu ta awan unay ti nakaro nga epekto ti bagyo Uwan.
Segun ken ni Manuel, adda ti 178 a pamilya wenno 541 nga indibidual ti naibakwit ditoy ciudad ti Laoag.
Kuna na nga itay bigat ket adda metten dagiti evacuees a nagawid iti balayda kalpasan a nagparbengen ti bagyo Uwan.
Maragsakan met ni Manuel gapu ta naadalanen dagiti residente isut gapuna a natallugod dagitoy a nagbakwit sakbay pay a narikna ti epekto ti bagyo ditoy ciudad ti Laoag.
Mainaig iti daytoy, kuna ni Mayor James Bryan Alcid a dakkel a tulong ti nasapa a pannakaibalakad kadagiti residente iti dagus a panagbakwit da.
Innayon na a no maipapan met iti supply ti food packs ket ado pay dagiti stock ditoy ciudad ti Laoag manipod iti Congressional Office.
Kuna pay ti mayor a no bilang addan to manen ti mapasaran a bagyo ket kastoy to metlaeng ti maaramid tapno masigurado nga awan ti nakaro a maapektaran ti kalamidad.
Nagyaman met ti mayor iti kooperasyon dagiti residente ken dagiti opisyal ti barangay ditoy ciudad ti Laoag.
Kabayatanna, inbatad met ti maysa kadagiti evacuees a ni Mrs. Sonya Ragasa Javier iti Brgy. 60-A, Caoacan ditoy ciudad nga inbaon ti kabsat na a mapan iti evacuation center gapu ta patienna a nataltalged daytoy iti panawen ti bagyo, aglalo ket pinarparautan da ti balayna tapno saan a basta madadael.
