LAOAG CITY – Maragsakan ni Gov. Cecilia Araneta Marcos a mangipakaammo nga addan dagiti sumagmamano nga umili ti nagaplikar iti Solar Rooftop Project ditoy probinsia.
Inbatadna a mabalin nga agpili dagiti nagaplikar wenno interesado ti naidiaya a pagutangan babaen ti GCash wenno Government Service Insurance System nga ag-loan para iti nasao a programa.
Inlawlawagna a mangidiaya pay ti Government Service Insurance System a mabalin a maka-utang dagiti empleado ti gobierno ken addaan ti nababbaba nga interest ngem saanna kayat a saoen a maaprobaran nga insigida ket dumalan pay ti naan-anay a panangberipikar no kualipikado daytoy ken agpaut laeng ti lima a tawen ti pannakabayad ti utang.
Malaksid iti daytoy, ti GCash ket mabalin nga uray asino nga interesado ngem addaan ti nangatngato nga interest a maipautang a mabalin a bayadan iti uneg ti 15 a tawen.
Al-allukoyenna pay dagiti interesado nga agaplikar iti nasao a proyekto gapu ta kalikagumna a saanda laeng a mangnamnama iti fossil fuel.
Innayonna a ti agdama ket awan ti makaibaga no ania dagiti sumaruno a pasamak ken uray agngudo ti gubat iti Middle East ket sigurado daytoy nga agpaut ti agbalin nga epektona iti intero a lubong.
