LAOAG CITY – Kinumpirmaran ti maysa a pinay idiay Belgium nga adda dagiti sumagmamano a Pilipino nga agsasakit gapu ti nakaro nga snow ti nasao a pagilyan iti agdama.
Nabigbig daytoy a ni Gracelyn de Mayo, taga Marcos, Ilocos Norte ngem agdama nga agnanaed idiay Belgium.
Segun kenkuana, gapu ti nakaro nga snow a mapaspasaran da iti agdama ket adda dagiti pada na a Pilipino nga aggugurigor ken agkurkuribetbet dagiti ima da.
Malaksid ti daytoy, kuna ni de Mayo nga ado pay dagiti pasdek negosyo a paralisado ti agdama gapu ti sitwasyon ti nasao a lugar.
Inadmitir pay ni de Mayo a marigatan da a mapan ti trabaho da gapu ta narigat ti dalan ken awan pay dagiti bus ken tren nga agbiyahe a nasapa.
Inpakaammo ni de Mayo a possible nga agpaot ti nasursurok ngem tallo a lawas ti panagpasar ti snow idiay Belgium.
