LAOAG CITY – Nakita ti sumurok 100 a sinkholes wenno dadakkel a rikki iti ili ti San Remigio idiay Cebu kalpasan ti idadayyeg ti 6.9 magnitude a gingined.
Inbatad ni San Remigio Mayor Mariano Martinez a madandanagan dagiti residente iti lugarda iti pannakaduktal kadagiti nasao a sinkhole.
Kunana a sakbay pay ti gingined ket dinakamat kadakuadan dagiti opisial ti Philippine Institute of Volcanology and Seismology (Phivolcs) mainaig iti presensia ti naruay a sinkholes iti nasao nga ili.
Inlawlawagna nga uray isuna ket nakigtot no ania ti kayat nga ipasimudaag dagiti sinkholes wenno adda ti posible a didigra iti lugarda.
Kinumpirmaran ni Martinez a dumanon iti 15 a sinkhole a nagduduma ti rukud ken kaunegna ti nakita iti Sitio Sansan, Brgy. Maño idinto a dagiti dadduma ket adda iti paset ti Poblacion ken nagwaras kadagiti dadduma pay a lugar iti ilida.
Kabayatanna, dagiti sumagmamano a residente a nakakita kadagiti sinkholes ket nagtatalaw ken nagibakwit iti lugar iti panagamak a mangitunda daytoy ti sabali manen a trahedya.
