LAOAG CITY – Nasugatan ti 110 nga indibidual gapu iti napasamak a wildfire iti asideg ti Marseille idiay France a maikadua a kadakkelan a siudad.
Segun ken ni Interior Minister Bruno Retailleau, agarup 800 a bumbero ti nagtitinnulong iti nagpatnag tapno sebseban ti nalawa nga uram.
Inbatadna a saan a bumaba iti 400 a tattao ti naibakwit manipud kadagiti pagtaenganda no sadinno nga adda ti siam a bumbero ti nasugatan.
Inlawlawagna a naabisoan dagiti residente nga agtalinaed iti uneg kadagiti pagtaenganda ken inallukoyna a saan nga agibakwit agingga nga awan ti pakdaar kadakuada tapno nawaya dagiti kalsada a pagdalyasatan dagiti emergency vehicles.
Mainaig iti daytoy, inpeksa ni French President Emmanuel Macron nga agdama nga adda iti state visit daytoy idiay United Kingdom ti naiget a suportana kadagiti bumbero ken kiniddawna kadagiti residente a sumurot kadagiti pagannurotan.
Naammoan a simmangpet ni Interior minister Retailleau idiay Marseille idi rabii ti Martes tapno kasarita dagiti lokal nga otoridad.
Kabayatanna, ti nasao nga uram ket nangrugi iti paset ti Pennes-Mirabeau nga amianan ti Marseille a dumanon iti 700 nga ektaria ti kalawa ti naapektaran iti wildfire.
