LAOAG CITY – Dimmalan ken nag-take ti umuna nga asignatura dagiti 12,029 iti pakabuklan a 13,441 a kualipikado a law graduates iti agtultuloy a 2026 online Bar Examinations idi kalman, Setiembre 6.
Naisayangkat ti eksaminasion iti 15 a local testing centers iti intero a pagilian iti babaen ti naiget a panangmanehar ti Supreme Court, Philippine National Police ken dagiti lokal a gobierno.
Basar ken ni Supreme Court Associate Justice Samel Gaerlan, saan pay maamoan ti eksakto a rason ti saan a pannakapapan dagiti dadduma nga examinees ngem posible a napanonot dagitoy a saanda pay nakasagana wenno fully prepared para iti national exam.
Inbatad ti korte a kaadoan kadagiti nag-take ti umuna nga asignatura ket babbai kabayatan adda sumagmamano a senior citizen ti nakikaysa iti eksaminasion.
Tapno masigurado ti kinakappia ken seguridad, inpatungpal dagiti lokal a gobierno ti liquor ban ken temporary road closures iti aglawlaw dagiti testing centers kas ti University of Santo Tomas ken San Beda University.
Kabayatanna, naikeddeng inton Setiembre 9 ken 13 ti pannakatuloy ti maikadua ken maikatlo nga aldaw ti Bar examinations no sadinno nakasagana dagiti adda pakainaiganna iti security ken traffic management plans.
