LAOAG CITY – Sumurok 200 a miembro ti Bureau of Fire Protection wenno BFP ti imbestigaran iti maipagarup nga “slot-for-sale” recruitment scheme, basar iti Department of Interior and Local Government (DILG).
Segun ken ni Interior Secretary Jonvic Remulla a sakup ti imbestigasion dagiti miembro iti intero a pagilian ken paset ti addang tapno lappedan ti korapsion ti ahensia.
Ti nadakamat nga imbestigasion ket kasaruno ti entrapment operation nga insayangkat ti Criminal Investigation and Detection Group (CIDG) Region 3 iti San Fernando City, Pampanga idi Agosto 24.
Nangitunda daytoy iti pannakaarestar ti agtawen 32 a miembro ti Bureau of Fire Protection a naarestar nga immawat ti P300,000 manipud iti complainant kasukat ti posision iti ahensia.
Malaksid iti daytoy, nagbayad ti P100,000 ken P800,000 iti sabali nga aplikante para iti slot iti ahensia iti iligal a wagas.
Mainaig iti daytoy, maikonektar iti recruitment scheme ti maysa a senior BFP officer iti CALABARZON a naikkaten iti posision ken naikabil iti restrictive duty bayat ti agtultuloy nga imbestigasion.
Nagkari ni Remulla a dalusanna ti Bureau of Fire Protection ken solbarenna ti isyu iti uneg ti innem a bulan.
