LAOAG CITY – Insingasing ni Manila 2nd District Rep. Rolando Valeriano a maipadalan iti audit ken inspeksion ti sumurok 400 a gas stations a nagserra iti pagilian.
Inbatad ni Valeriano, napateg a matingiting ti records of deliveries kadagiti nasao a paggasolinaan kasta pay ti fuel inventories-da ken panangsurot iti panangipaay ti umno a sueldo ken benepisio kadagiti mangmanggedda.
Gagem ti singasing ni Valeriano a maammoan ti pudno a makaigapu ti panagserra dagiti nadakamat a gas stations.
Inpettengna a babaen iti daytoy ket makita no adda ti fuel pay wenno awanen kadagiti nasao a paggasolinaan, no dagitoy ket karaman iti hoarding ken profiteering ken no dagitoy ket nakapasar ti problema ti pinansial.
Innayonna a masapul a maammoan no ania ti nasken nga addang no kasano nga akomodaren dagiti customers dagiti nasao a paggasolinaan a nagsardeng ti operasion iti baet ti mapaspasaran a krisis iti agdama.
