LAOAG CITY – Nangiwayat ti tignay protesta ti sumurok walo a milyon nga indibidual kadagiti nagduduma a paset ti Estados Unidos.
Inawaganda daytoy kas “No Kings” protest no sadinno a konkontraenda dagiti pagannurotan nga ipatpatungpal ni United States President Donald Trump.
Sumagmamano kadagiti pagannurotan ket pakairamanan ti gubat idiay Iran, panangpaiget iti immigration ken ti agtultuloy a panagngato dagiti magatgatang.
Nagtitipon ti naruay a tattao manipud idiay Los Angeles, Boston, New York, Washington DC, Houston ken dadduma pay.
Karaman payen ti Minnesota a linagipda dagiti natay nga isuda Renee Nicole Good ken Alex Pretti a pinaltu-paltogan ti federal immigration agents.
Nakipaset iti tignay protesta ti sumagmamano a showbiz personalities kas kada actor Robert De Niro ken singer a ni Bruce Springsteen.
Nagbalin a naiget ti panagbantay dagiti otoridad no sadinno nga adda ti sumagmamano nga indibidual ti inarestar idiay Los Angeles gapu iti pananggandat a panangdangran kadagiti otoridad.
Naiwayat pay ti tignay protesta kadagiti sumagmamano a pagilian kas iti Paris, London ken Lisbon, Portugal.
Naartapan ti tignay protesta ita ti naiwayat a “No Kings” protest idi Oktubre iti napalabas a tawen.
