LAOAG CITY – Inpakaammo ni P/Maj. Divina Albino, Regional Public Information Officer ti Philippine National Police Regional Office 1 nga adda ti sumurok-kumurang uppat a ribu a pulis ti naiwaras iti intero a rehion uno para iti Holy Week 2026.
Segun kenkuana, kabinnulingda ditoy ti sumurok 700 manipud kadagiti partner agencies ti kapulisan pakairamanan dagiti force multipliers.
Inbatadna nga iti agdama ket nakaisayangkaten ti kapulisan ti sumurok 130 nga inisyal nga aktibidad kaduada dagiti nadakamat nga ahensia tapno masigurado ti seguridad ti publiko.
Inpasingkedna a ti nasao a bilang dagiti pulis a naiwaras iti intero a rehion uno ket umdas ken nakasagana dagitoy a bantayan dagiti sakupenda a lugar.
Inlawlawagna nga adda met ti nailatang a pundo para iti subsidy allowance para kadagiti amin a pulis a naka-deploy ditoy Ilocos Norte, Ilocos Sur, La Union ken Pangasinan ita a Semana Santa.
Innayonna pay a naiget ti pannakikoordinarda kadagiti nagduduma a Local Government Units ken ahensia tapno mapagtalinaed ti linak, urnos ken talna ita nga Holy Week.
