LAOAG CITY – Dumanon iti 364 nga indibidual dagiti naglabsing iti traffic ordinance kageddan ti umuna nga aldaw a pannakaipatungpal ti Comelec Checkpoint.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, manipud iti nasao a bilang ket kaadduan kadagitoy ket awan ti lisensiana, saam a nangisuot ti helmet ken saan a nagusar ti high visibility vest kabayatan ti panangiturongda kadagiti luganda.
Inbatadna a basar iti datos ket kaadduan kadagiti motorista a naglabsing ket manipud ditoy siudad ti Laoag ken iti ili ti Bacarra.
Inlawlawagna a gapu iti daytoy ket ad-adda pay a paigetan ti kapulisan ti panangipatungal ti Comelec Checkpoint kadagiti nagduduma nga ili ken siudad ditoy probinsia.
Kabayatanna, indauloan ni Atty. Joel Gines, Provincial Election Supervisor ti Commission on Elections ti umuna nga aldaw a pannakaipatungpal ti Comelec Checkpoint kaduana ni Atty. Julius Balbas, Commission on Elections Officer ditoy siudad ti Laoag ken dagiti pulis manipud iti Laoag City Police Station.
