LAOAG CITY – Inlawlawag ni Engr. Ma. Teresa Bacnat, ti OIC ti Provincial Agriculture Office a saan a mapaspasaran ti Ilocos Norte ti panagsobra ti suplay ti kamatis ita a bulan.
Segun kenni Bacnat, iti agdama ket offseason iti kamatis ken dagiti mailaklako kadagiti merkado publiko ket aggapo iti sabali a probinsya.
Inbatad na nga adda met dagiti mula a kamatis ditoy probinsya ngem bassit laeng.
Dinakamat pay ni Bacnat a sipud nagrikep ti NFC ket arig na bimmasit dagiti nagmula ti kamatis gapo ta awan ti pagikabilan da kadagiti maapit.
Mangnamnama ni Bacnat a no adda ti Tomato Food Storage ket mabalin nga umado ti bilang dagiti agmula ti kamatis gapo ta adda ti pakaipanan da kadagiti produkto da.
Mainaig iti daytoy, adda met dagiti nagpilyan dagiti mannalon ti kamatis nga inmula kas kadagiti high-value crops wenno dagiti tarong, sitaw ken dadduma pay, ken daytoy ti nagbalin nga aternatibo a mula dagiti maseknan.
Kabayatanna, patien ni Bacnat a dakkel a tulong ti cropping calendar tapno maliklikan ti pannakasayang dagiti maimula.
Innayon na a nasken a no kasano ti kasano ti kaado ti demand iti merkado ket isu ti maimula tapno awan ti masayang.
